心理健康測試
聯絡我們
咩叫做堅定有威嚴嘅父母？示範下先：
餐廳入面
👩🏼媽問6歲仔：仔你想食咩？焗豬扒飯定餃子烏冬？（6歲有時都可以用下假民主呢招）
👦🏻仔：我要食雪糕
👩🏼：你仲咳緊，琴晚先退燒，要好翻先食
👦🏻：（大聲話）我要食雪糕！
👩🏼：好翻就有得食，而家要揀過第二款
👦🏻: 你唔俾我食雪糕，我好憎你！我想撕開你！
👩🏼：我知道你因為無得食雪糕，好嬲好想食，但都唔可以咁樣同媽媽講嘢，媽媽聽到會唔開心。你冷靜下，我食住先。你諗到食咩再話我知（媽媽叫野食嘢自己食，餐牌放喺枱）
如果下咗啖氣中途揀到食咩就即時讚：做得好好喎，揀到一樣啱自己嘅食物
如果一路鬥氣唔出聲唔叫嘢食，自己食飽先，俾最後通牒：你5分鐘內唔叫嘢食，我地就埋單走喇，你之後肚餓再話我知，我買麵包你食（👩🏼言行一致，5分鐘後見👦🏻無動靜就埋單一齊走）
以上處理有特殊因素：啱啱病好，接受佢心情會唔係咁好，俾空間佢發脾氣。但呢個方法唔可以次次用，因為都要鼓勵跟番大隊食野，唔係話自己鍾意食包就可以唔食正餐。
咁其他父母會點？
🙅🏼♀極權佢大哂型：一定要依家食我揀食物，你夠膽表達不滿睇我鏟唔鏟你上天花板！
🙇♀放任縱容型：你病咗咁耐好慘呀，食雪糕呀？想食咩味呀？
🤷🏼♀唔關我事型：有對活喺自己世界嘅父母，有得你食算好喇，仲斟酌健唔健康… 堅定有威嚴既父母，識得肯定小朋友嘅感受。肯定感受點解咁重要？
首先要問：成長係啲乜？就係不斷適應社會要求，學習接受自己嘅需要同唔會即時俾滿足，識得分輕重同為自己長期利益著想。堅定有威嚴嘅父母幫小朋友捱過無得即刻食雪糕嘅沮喪，小朋友亦同時有機會學習到其實沮喪唔死得人既，過一陣就會無野，只要自己俾心機好好休息，好翻一樣有得食👈🏻👈🏻👈🏻呢啲就係EQ訓練喇
極權型嘅家長會覺得，洗咩咁麻煩解釋咁多啫，無得食咪無得食囉。係嘅，即時嘅結果表面上同堅定型嘅父母無分別:小朋友都係嬲、唔想合作。但極權型既管教連表達嘅機會都唔俾，人係有情感嘅動物，啲憤怒、仇恨係會累積嘅。
你以為極權打壓，到佢長大咗就會明白你用心良苦同好孝順你？Sorry, 人唔係咁運作嘅，當怨恨累積到一個點，對方只會滿腦子想擺脫你：著名既小提琴家Vanessa Mae 喺21歲就炒咗佢個虎媽兼經理人，之後仲有超過15年同阿媽斷絕來往。
所以聽唔聽小朋友嘅意見，唔應該根據佢嘅表達方式係咪合理：你話佢表達得好激烈好任性，咁你問下自己有無俾機會同佢溝通？應該以嗰件事本身合唔合理去決定跟定唔跟，咁先唔會累積怨恨，到有機會發出來時一發不可收拾。
楊健恩
Edge臨床心理學家
============================
普及心理 歡迎轉載
想睇埋其他專家貼士，請PM提供電郵地址
本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#做個無憂父母#心理健康#精神健康#視像輔導#網上輔導#壓力#管教#家長#教養
