心理健康測試
聯絡我們
我曾經聽過為人母親者：如果小朋友用激烈任性嘅方法提出要求，而你又遷就佢，就等於縱容呢啲行為，第日會後悔。No way! 等我以正視聽啦!
家長類型，大致分四種：
1. 🙆🏼♀堅定有威嚴型 authoritative： 我好清楚俾孩子知道有咩做得、有咩係唔做得。適當時候我會讚，但唔會將孩子捧到上天；懲罰亦會及時，但都會提供機會改善。
2. 🙅🏼♀極權佢大哂型authoritarian：有種「我一定啱，你諗嘅嘢一定無我咁好」嘅心態。孩子嘅感受唔重要，最重要係行我鋪嘅路。
3. 🙇♀放任縱容型permissive：覺得孩子「好可愛、仲好細個」，孩子想要咩都會盡量提供；因為孩子係全世界最重要，我咩都會幫孩子做曬。
4. 🤷🏼♀唔關我事型uninvolved：生咗出嚟，我提供左三餐溫飽就夠喇。就算我唔理你，你自己都會大，最好唔好煩到我。
咁唔同類型嘅父母對小朋友有咩影響？講之前留意以下幾點：
– 呢啲類型都唔係絕對嘅，通常都係混合型：譬如七分堅定三分縱容 (或者心情好時縱容型，心情唔好時唔關我事型）
– 沒有兩個孩子的父母是相同的 no two children have the same parents: 就算係兄弟姊妹，父母都會對唔同嘅仔女有唔同嘅教法（譬如對大嘅嚴謹，細嘅輕鬆。又例如新手父母特別緊張，但養好一個、信心大啲，自然會鬆啲)
– 承上題，你父母當年點湊你唔代表會以同樣方式湊你個仔，即使佢當年可能係極權型，到湊孫時就變咗縱容型。所以作為父母俾長老湊時要時先溝通清楚：
對小朋友嘅影響：
1. 🙆🏼♀堅定有威嚴型authoritative: 我知自己應該做咩唔應該做咩，我有時會搗蛋會發脾氣，爸媽罰我嘅時候我都會驚，不過我好清楚講爸媽都係錫我嘅
2. 🙅🏼♀極權佢大哂型authoritarian：我知道爸媽要我做咩，不過我唔知點解要我咁做，我有啲咩諗法同感受都唔敢表達，因為講左都無用，爸媽都唔會聽
3. 🙇♀放任縱容型permissive：我係全世界最重要嘅，我比其他同學仔朋友仔更叻，我想要嘅嘢要即刻攞到，無朋友唔緊要，反正我一唔開心就有大人會氹番我
4. 🤷🏼♀唔關我事型uninvolved：我係一個唔重要嘅人，唔可以俾麻煩父母，其實心底裡我都好渴望關注渴望愛，不過我唔可以表達出嚟，我學識壓抑自己去迎合人
睇到呢度, 好明顯係堅定有威嚴最好啦！點解？因為一個字：Validation (發音：花哩地純；中文係四個字：認同。感受）
重點在下集，請繼續收看！
楊健恩
Edge臨床心理學家
============================
普及心理 歡迎轉載
本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#做個無憂父母#心理健康#精神健康#視像輔導#網上輔導#壓力#管教#家長#教養
