专家精选文章

咩叫做坚定有威严嘅父母？示范下先：

餐厅入面

👩🏼妈问6岁仔：仔你想食咩？焗猪扒饭定饺子乌冬？（6岁有时都可以用下假民主呢招）

👦🏻仔：我要食雪糕

👩🏼：你仲咳紧，琴晚先退烧，要好翻先食

👦🏻：（大声话）我要食雪糕！

👩🏼：好翻就有得食，而家要拣过第二款

👦🏻: 你唔俾我食雪糕，我好憎你！我想撕开你！

👩🏼：我知道你因为无得食雪糕，好嬲好想食，但都唔可以咁样同妈妈讲嘢，妈妈听到会唔开心。你冷静下，我食住先。你谂到食咩再话我知（妈妈叫野食嘢自己食，餐牌放喺枱）

如果下咗啖气中途拣到食咩就实时赞：做得好好喎，拣到一样啱自己嘅食物

如果一路斗气唔出声唔叫嘢食，自己食饱先，俾最后通牒：你5分钟内唔叫嘢食，我地就埋单走喇，你之后肚饿再话我知，我买面包你食（👩🏼言行一致，5分钟后见👦🏻无动静就埋单一齐走）

以上处理有特殊因素：啱啱病好，接受佢心情会唔系咁好，俾空间佢发脾气。但呢个方法唔可以次次用，因为都要鼓励跟番大队食野，唔系话自己钟意食包就可以唔食正餐。

咁其他父母会点？

🙅🏼‍♀‍极权佢大哂型：一定要依家食我拣食物，你够胆表达不满睇我铲唔铲你上天花板！

🙇‍♀‍放任纵容型：你病咗咁耐好惨呀，食雪糕呀？想食咩味呀？

🤷🏼‍♀‍唔关我事型：有对活喺自己世界嘅父母，有得你食算好喇，仲斟酌健唔健康… 坚定有威严既父母，识得肯定小朋友嘅感受。肯定感受点解咁重要？

首先要问：成长系啲乜？就系不断适应社会要求，学习接受自己嘅需要同唔会实时俾满足，识得分轻重同为自己长期利益着想。坚定有威严嘅父母帮小朋友捱过无得即刻食雪糕嘅沮丧，小朋友亦同时有机会学习到其实沮丧唔死得人既，过一阵就会无野，只要自己俾心机好好休息，好翻一样有得食👈🏻👈🏻👈🏻呢啲就系EQ训练喇

极权型嘅家长会觉得，洗咩咁麻烦解释咁多啫，无得食咪无得食啰。系嘅，实时嘅结果表面上同坚定型嘅父母无分别:小朋友都系嬲、唔想合作。但极权型既管教连表达嘅机会都唔俾，人系有情感嘅动物，啲愤怒、仇恨系会累积嘅。

你以为极权打压，到佢长大咗就会明白你用心良苦同好孝顺你？Sorry, 人唔系咁运作嘅，当怨恨累积到一个点，对方只会满脑子想摆脱你：著名既小提琴家Vanessa Mae 喺21岁就炒咗佢个虎妈兼经理人，之后仲有超过15年同阿妈断绝来往。

所以听唔听小朋友嘅意见，唔应该根据佢嘅表达方式系咪合理：你话佢表达得好激烈好任性，咁你问下自己有无俾机会同佢沟通？应该以嗰件事本身合唔合理去决定跟定唔跟，咁先唔会累积怨恨，到有机会发出来时一发不可收拾。

杨健恩

Edge临床心理学家

============================

普及心理 欢迎转载

想睇埋其他专家贴士，请PM提供电邮地址

本篇文章亦于作者个人专页刊登

心理学妈（https://www.facebook.com/onbecomingmama/）

============================

管教孩子，好多时都会好大压力。我哋心理学家可以提供Skype、Zoom等视像辅导服务，逐步教你有效管教，做个无忧父母！欢迎Facebook Pm我哋，或者Whatsapp 5539-6773倾倾吖。

#做个无忧父母#心理健康#精神健康#视像辅导#网上辅导#压力#管教#家长#教养