黃子華話，婆媳係一定奶嘢嘅關係。
而Edge心理學家話，新手父母係一定會鬧交嘅配搭🤦♀。
唔係齋噏嘎，係婚姻輔導神級治療師John Gottman 做嘅研究得出得出嚟嘅結論：
新手父母有67%都話BB嚟咗之後令夫妻關係差咗
最差係喺BB 半歲至9個月左右：新生命來臨嘅興奮已減退，而夫妻矛盾漸漸浮現，自然就會多咗不滿。
唔需要覺得洩氣，會有矛盾可能係因為大家都緊張BB。其實只要目標一致，而未生BB前夫婦關係OK ，大家一定可以搵到個舒服嘅方法繼續落去💪。
有不滿同矛盾盡量唔好收埋，亦唔好放得太大。適量而恰當咁表達係可以促進大家了解，而接著嘅post我就會教大家點樣鬧場好交。
睇完可能即刻想搵另一半開片🤣（講笑啫）
第一招
相信鬧交嘅價值，俾心機表達感受❤️
喺好嬲好嬲嘅時候，有時真係唔想講嘢，唔出聲過一陣好似真係無咁嬲喎，之後件事過咗又好似唔係好值得提🙊。
整整下你就慣咗嬲都唔出聲，對方又會慣咗你嬲時唔洗理你，以為你發作完過一陣會正常番，結果係佢唔知你成日嬲乜，你又覺得佢唔了解你，大家愈行愈遠。
所以我鼓勵鬧少少交：講出嚟先有機會俾大家更了解對方，唔講就只會冷戰，繼而無疾而終
🙅🏼♀🙅🏼♂: 俾小朋友睇到鬧交唔係幾好？
💕💕: 日嘈夜嘈梗係唔好啦，但間唔中有衝突，反而會幫助小朋友成長。成日都會講唔好製造個溫室俾小朋友，所以父母鬧交會教識小朋友有人嘅地方就會有衝突。如果俾佢睇到父母如何面對同化解衝突，之後點樣修補關係，正正就係社交訓練囉！小朋友長大咗都會知唔洗怕衝突！重點係點拆解同妥協❇️。
實在遇到無數怕鬧交影響小朋友嘅父母，令我好想提一提呢個研究去説服大家冷戰對小朋友嘅傷害。（有點長，不喜歡可skip）
話說當年我陀住大B🤰🏼時，放咗工就撲去亞洲家庭治療學院上堂，🎓神級家庭治療師李維榕教授🎓做過咁嘅研究：
1️教授首先搵咗好多個家庭返嚟，每個家庭分兩間房坐。父母同治療師坐一間房，而孩子坐另一間房。
2️兩間房用單向鏡隔住，孩子睇到父母、父母睇唔到孩子。
3️孩子戴住耳筒聽父母對話，個身就駁咗機量度心跳、皮膚導電率（愈導電即係愈多汗、愈多汗即刻愈緊張，同測謊機原理一樣）同體溫，實時記錄。咁可以睇到父母嘅互動對孩子有咩影響。
4️之後治療師會引導父母提出最近一次意見不合嘅內容並拎出來講。
5️結果係，鬧到拆天嘅父母同冷戰嘅父母對孩子做成嘅傷害差唔多！即係話，好多人以為孩子個樣好似無嘢，但其實身體反應係好大！孩子其實係好緊張同好擔心，只係唔知點表達。
之後治療師俾返啲數據父母睇，更有力咁説服佢哋面對同處理婚姻問題，唔好俾啲問題不了了之，令屋企氣氛長期低落，對孩子傷害一樣深遠。
睇到呢度，希望大家下次鬧交前俾啲心機，努力將你嘅不滿化做語言，先會有出路！
楊健恩
Edge臨床心理學家
============================
普及心理 歡迎轉載
想定期收到專家貼士，請將電郵PM我們
本篇文章亦於作者個人專頁刊登
心理學媽（https://www.facebook.com/onbecomingmama/）
============================
維持夫妻關係，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#親子#夫妻#拍拖#愛情
