假設小朋友默書或者考試攞咗高分，你會點讚佢？有啲家長會話：「好聰明喎﹗咁高分﹗我知你係好醒格，呢啲嘢一定難唔到你嘅﹗」有啲家長又會話：「唔好咁讚佢呀，會讚壞㗎。」邊樣先真？
首先，要知道應唔應該咁讚小朋友，我哋要先知道讚賞係點運作，點解會有用。讚一個人唔係因為你想佢開心，唔係要佢自我感覺良好，亦唔係只係要認可佢嘅努力咁簡單。讚賞係獎賞嘅一種，對影響行為好有用。當我哋因為某個人做咗某一個好嘅行為而獎賞一個人嘅時候，呢個人會將個獎賞連繫咗落個行為度，喺將來做多啲呢個行為去博取更多嘅獎賞。所以，獎賞可以令一個人喺將來做更多某個行為。
正正因為咁，邊個行為連繫咗落個獎賞度就好重要喇。而我哋讚賞嘅內容，係可以影響到小朋友將邊個行為連繫落個讚賞度。如果我哋喺佢拎到高分嘅時候讚佢： 「好聰明喎﹗咁高分﹗我知你係好醒格，呢啲嘢一定難唔到你嘅﹗」 咁佢係將邊個行為連繫落個讚賞度？聰明？聰明唔係行為。咁賣弄小聰明係咪行為？係。而要賣弄小聰明即係要喺唔溫書嘅情況下都可以考到高分。所以，你嘅讚賞變相鼓勵咗佢唔溫書。
從行為學嘅角度，好明顯答案係我哋唔應該讚小朋友聰明。咁應該讚佢啲咩呢？既然我哋知道小朋友會將讚賞連繫到佢做嘅某個行為，我哋應該把握機會讚佢一啲我哋想佢做多啲嘅行為，亦即係一啲小朋友可控制嘅因素，例如努力溫書、識咗一啲上次默書唔識嘅字、犯少咗啲唔小心嘅錯誤等等。例如，家長可以講： 「好叻喎你識咗上次唔識嘅嘢喎，你一定係好努力溫書喇﹗」 「你今次好小心喎，無乜錯到啲唔小心嘅錯誤，抵讚﹗」 此外， 其實呢啲「可控制因素」，大部分都同分數無關。即係話，家長唔駛等到派分先至讚小朋友，你大可以喺小朋友溫書嘅時候已經讚佢勤力、讚佢專注。而就算有啲行為係派咗卷之後先知道，例如佢有冇犯唔小心嘅錯誤、佢有冇識返啲上次唔識嘅嘢等，家長亦可以只係同小朋友檢討呢啲行為，而隻字不提個分數，等小朋友唔好咁關注個分數。點解要小朋友唔好咁關注個分數呢？因為分數控制唔到(受太多因素影響，例如份卷嘅深淺)，而且小朋友關唔關注分數對佢嘅學習表現同動機有好大影響。下回分解。
Edge教育心理學家
蔡博麒
============================
普及心理 歡迎轉載
想睇埋其他專家貼士，請PM提供電郵地址
讀者如有問題想問專家，歡迎電郵至[email protected]
============================
照顧孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效照顧，做個無憂父母！歡迎Facebook Pm我哋，或者Whatsapp 5539-6773傾傾吖。
