如果我話要留言「+1」先俾你知道內容嘅話，我估應該可以泵大讀者流量，因為呢個世界無咩父母唔想自己嘅仔女叻。不過Edge心理學家好忙，唔得閒逐個覆，同埋希望呢度繼續做學術交流平台。因此如果你想繼續睇，麻煩like下，無人like我會以為無人睇，就無癮寫落去🤷🏼♀ 🙋🏼♀🙋🏼♂：講咁耐，你都係想𠱓like啫，豪俾你啦!
其實我係想曲線表達，大部分人都係喜歡被稱讚。稱讚得恰當，人人都可以增加動力，繼續奮鬥! 🙋🏼♀🙋🏼♂：打鬧又話犯法，讚又要有技巧，乜咁麻煩架… 其實稱讚都唔係咁難，你睇完呢個篇心理專欄就會明白架喇!
首先，咩叫叻？愛因斯坦有個好好嘅定義：Genius is 1% aspiration and 99% perspiration. 天才係由1%嘅天資同99%嘅堅持構成。即係話，天生轉數快，都要有無比嘅堅持配合先可以成功。任何獨特材能，都必須透過努力不懈嘅鍛練同磨練出來嘅。
即係如果想小朋友長大能獨當一面，喺佢成長期要培養嘅唔係單只轉數快、小聰明，而且要訓練堅持做一件事嘅毅力。因為任何一項專長，都總有某部分係沉悶:（譬如心理治療很有趣，但背後是持續不斷嘅進修同沈重嘅paper work), 如果只挑選好玩嘅黎做，就好難圓滿咁完成任何一件事。
咁點先可以培養毅力？哈佛心理學家Carol Dweck破解到呢個關鍵。佢發現如果讚小朋友叻，佢哋對再嘗試同試啲難少少嘅嘢就會無曬動力，點解？因為小朋友會諗「我已經証明咗我夠叻，唔需要繼續努力喇」或「如果我再試或者做啲難啲嘅嘢, 我做唔到咪代表我唔叻？都係試啲安全啲嘅嘢先!」 育兒其中一個死穴就係將自己童年缺失嘅嘢過量咁投放喺自己小朋友身上。細個無人讚我，令我覺得無人睇到我嘅努力，覺得有缺失。因此我要好好咁讚自己仔女，連一啲本來就係仔女適齡嘅責任，都會不斷讚佢。
咁做嘅問題係: 呢個社會唔係咁運作。小朋友喺屋企做小小事都獲得大量認同，出到來社會做好多事先可能獲得小小認同，咁咪間接製造咗朵溫室小花，好難適應社會要求？
講咁耐，其實都係想大家下次讚小朋友叻之前，停一停、諗一諗：究竟呢個讚係小朋友需要嘅，定係我需要嘅？
咁Carol Dweck有咩建議呢？佢就話要稱讚過程中小朋友付出嘅努力。即使結果同你預期有出入，因為Carol Dweck相信，只要肯努力，小朋友始終都會活出自己生命嘅色彩。
所以Edge心理學家覺得，Carol Dweck講嘅，唔係單只係叫父母改口，由讚「你好叻喎」改成「好努力喎」（雖然兩者都重要）。除咗咁做之外，都誠邀父母從心底裏面擴闊眼界：其實人生流流長，成敗不只決定於一次默書、一個考試、一次升學，而係喺長遠嘅人生路上。能否順流逆流都堅持努力不懈，收放自如，先係人生成功關鍵。
楊健恩
Edge臨床心理學家
============================
普及心理 歡迎轉載
想睇埋其他專家貼士，請提供電郵地址
本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
