专家精选文章

Q：Edge心理學家，玩具喎，唔係愈多愈開心咩？

梗係唔係啦！你有無試過去一間餐廳時，店員俾咗成叠餐牌你，搞到你揀唔落手，選擇困難症發作？
（注意 ：呢個世界無選擇困難症呢個病，但某啲病會有呢個徵狀︰例如抑鬱症患者有集中力不足嘅問題，令佢變得好難做決定。）

現代家長俾子女嘅資源多過上一代，尤其係雙職家庭（即爸媽都有全職工作）︰父母無時間陪伴子女，唯有用物質彌補。
其實小朋友需唔需要咁多玩具呢？嗱，我又要幫大家慳錢喇！

小朋友，尤其喺6歲前，専注力發展未成熟，好容易受環境影響。開住電視做功課係無可能嘅事，就算佢扮做，個心都會飛咗去個電視到。（所以要做功課就熄電視喇！）

你俾10樣玩具佢，佢唔會每一樣都專心玩，而會每件玩一陣就轉另一件，再返轉頭玩返之前嗰件。咁會有咩問題呢？
1. 佢只會學識點樣操作件玩具（㩒邊個制會有聲、邊個制會有燈），但無諗到呢件玩具可以有100種玩法。
2. 學識操作件玩具係被動嘅玩法（因為係跟返件玩具本身嘅設計去玩）。超越件玩具本身嘅玩法，自創新招，先係主動嘅玩法。
3. 主動去玩、超越本身玩法，係培養小朋友創意(creativity) 、自信 (self-esteem) 、同自主(sense of mastery) 嘅基礎。

所以結論係，俾少啲玩具佢，有助佢激發創意、培養自主同建立自信！咁幾多為之啱啱好？
1. 佢睇到又攞到嘅玩具量，係佢幾日內夠時間玩哂嘅。
2. 同一款不過三：即係可以有車，但只可以有三架車；可以有公仔，但只可以有三隻。
3. 已經有太多玩具，但又想繼續加，可以收起已經唔玩嘅玩具。例如：一歲之後唔點睇玩具書就可以收起佢，之後先添啲新玩具。

咁啲親戚朋友好心買玩具俾小朋友，唔通唔要？
咁就要考考你啲智慧同堅毅喇！小朋友未識邏輯思維，你同佢講道理佢未必明。但如果你好好控制同善用玩具、零食等去引導佢，就可以培養好行為！
即係話，如果佢本來就擁有一大堆玩具，又隨時可以食一大堆零食，物以罕為貴，你無可能用到玩具同零食去引導佢 ！
所以我屋企入面玩具最多嘅地方唔係喺廳，而係喺小朋友唔會去嘅地方(e.g. 雜物房)。仲有，我會喺適當時候先放新玩具出嚟，而唔到半個月都唔加新玩具。

英文伸延閱讀：
www.telegraph.co.uk/science/2017/12/05/many-toys-bad-children-study-suggests/amp/

楊健恩
Edge臨床心理學家
============================
普及心理 歡迎轉載
想定期收到專家貼士，請將電郵PM我們

本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#做個無憂父母#心理健康#精神健康#視像輔導#網上輔導#壓力#管教#家長#教養