专家精选文章

Q: Edge心理學家，滿月BB好細個咋喎，咁快就要開始訓練EQ？

其實BB都有能力調節自己嘅情緒架，唔好低估佢地（係實証方法！）

不如大家先認識下EQ係咩先啦：emotional intelligence最早喺1964年由Michael Beldoch提出。可惜Daniel Coleman喺1995寫咗本叫emotional intelligence嘅書大賣，令大家都以係佢提出（結果妺仔大過主人婆。呢件事說明宣傳嘅重要，原作者要有好高EQ先接受到 ）

佢哋都係想研究，點解明明身邊有人好叻但總係做咩都唔成功；而另外有啲人本身唔叻但順風順水，去到邊度人際關係都扶搖直上呢？之後佢地發現，淨係IQ高係唔夠架！原來每個人調節自己情緒嘅能力都有高低，呢個能力嘅高低就好影響嗰個人能唔能夠將自己嘅能力發揮到最盡，即係IQ都要EQ配合先可以成功。

譬如好似考試咁，如果明明已經識哂，但好驚考得唔好會比人鬧，就會觸發腦入面嘅危機處理中心（即係核桃體）。咁樣會直接影響記憶能力，愈緊張就愈寫唔出。反而如果輕輕鬆鬆去考試，就更能夠讓記憶源源不絕咁出返嚟，真正發揮到學咗嘅嘢。

所以EQ好重要架！咁呢樣關滿月BB咩事呢？就係如果教識佢自我調節 (self sooth) ，佢訓醒唔會即刻爆喊、眼訓又唔會扭計、眼訓仲識自己訓，家長就會無咁辛苦，亦可以享受有BB嘅樂趣。而家庭氣氛良好，最終得益嘅都係BB！

咁滿月BB有咩情緒呢？多囉，肚餓會喊、未瞓飽唔舒服會喊、濕咗片會喊、太熱太凍太濕太乾都會喊。呢啲都係BB嘅情緒，而喊係對呢啲好自然嘅反應。咁除咗大喊要人幫手之外，仲有無其他可能性呢？

喺大人可以幫到手之前，總會有少少空檔（開奶暖奶都要時間啦！）。點樣去面對呢個空檔就同EQ息息相關！如果識得眼睛周圍望下，娛樂下自己，並相信自己嘅需求會得到滿足，呢個就係高EQ嘅BB喇（當然不能太肚餓同有其他部位唔舒服啦）。咁呢個自我調節嘅能力有無得訓練呢？（梗係有先出post啦，唔驚俾人話廢咩 ）

以下9步曲唔係我自創，係我之前去香港嬰幼兒心理健康協會Hong Kong Association of infant mental health 嘅硏討會學，叫做soothability training (自我安撫訓練)

BB喊，點算好？
1. 先觀察佢可唔可以自己安靜落黎（有時佢可能依呀幾聲, 幾秒就停）
2. 近距離對望（俾佢望到你望佢，即時安心左先）
3. 溫柔咁同佢講下嘢（點呀BB, 係咪肚餓豬呀）
4. 輕輕摸下佢，手放肚仔
5. 輕輕摸下佢，握下手
6. 抱起佢
7. 輕搖佢
8. 用包巾包實佢
9. 最後都係安靜唔到先俾奶咀

注意
1. 大前提係BB嘅生理需要已經被滿足，先好行呢9部曲。佢肚餓你都係餵飽咗佢先啦！

2. BB安靜咗就唔洗進級去下一步。

3. 以前有人提出BB喊就由得佢唔好理，我係反對架。BB能力咁低咁無助，一定要透過滿足佢嘅需要先可以建立安全感。

4. 以上9步曲唔洗次次用，只需要間唔中試下，睇下BB準備好學識自我安撫未。BB都係要抱嘅, 如果佢已經識自我安撫，唔洗暗都訓到，就可以喺平時唔喊時抱番多d, 滿足返大家嘅情感連結。

5. 有BB未食過奶咀個咀仔都識木下木下好似啜奶咀咁，呢個就係自我安撫既表現，千祈唔好因為咁而以為佢要奶咀呀。

6. 成個9部曲係短時間內進行，拖太長先照顧佢嘅需要就變疏忽照顧喇。

Q：BB已經依頼咗奶咀同要人暗先訓得著，點算好？

咁又唔係真係咁大件事嘅，都係嗰句，來日方長，自我安撫總有機會學到，大把方法學EQ， 出呢啲貼文係為咗大家育兒路順暢啲 、舒服啲。如果條件許可又可以早啲教BB，何樂而不為

楊健恩
Edge臨床心理學家
============================
普及心理 歡迎轉載
想定期收到專家貼士，請將電郵PM我們

本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#做個無憂父母#心理健康#精神健康#視像輔導#網上輔導#壓力#管教#家長#教養