专家精选文章

如果我话要留言「+1」先俾你知道内容嘅话，我估应该可以泵大读者流量，因为呢个世界无咩父母唔想自己嘅仔女叻。不过Edge心理学家好忙，唔得闲逐个覆，同埋希望呢度继续做学术交流平台。因此如果你想继续睇，麻烦like下，无人like我会以为无人睇，就无瘾写落去🤷🏼‍♀‍ 🙋🏼‍♀‍🙋🏼‍♂‍：讲咁耐，你都系想𠱓like啫，豪俾你啦!

其实我系想曲线表达，大部分人都系喜欢被称赞。称赞得恰当，人人都可以增加动力，继续奋斗! 🙋🏼‍♀‍🙋🏼‍♂‍：打闹又话犯法，赞又要有技巧，乜咁麻烦架… 其实称赞都唔系咁难，你睇完呢个篇心理专栏就会明白架喇!

首先，咩叫叻？爱因斯坦有个好好嘅定义：Genius is 1% aspiration and 99% perspiration. 天才系由1%嘅天资同99%嘅坚持构成。即系话，天生转数快，都要有无比嘅坚持配合先可以成功。任何独特材能，都必须透过努力不懈嘅锻练同磨练出来嘅。

即系如果想小朋友长大能独当一面，喺佢成长期要培养嘅唔系单只转数快、小聪明，而且要训练坚持做一件事嘅毅力。因为任何一项专长，都总有某部分系沉闷:（譬如心理治疗很有趣，但背后是持续不断嘅进修同沉重嘅paper work), 如果只挑选好玩嘅黎做，就好难圆满咁完成任何一件事。

咁点先可以培养毅力？哈佛心理学家Carol Dweck破解到呢个关键。佢发现如果赞小朋友叻，佢哋对再尝试同试啲难少少嘅嘢就会无晒动力，点解？因为小朋友会谂「我已经证明咗我够叻，唔需要继续努力喇」或「如果我再试或者做啲难啲嘅嘢, 我做唔到咪代表我唔叻？都系试啲安全啲嘅嘢先!」 育儿其中一个死穴就系将自己童年缺失嘅嘢过量咁投放喺自己小朋友身上。细个无人赞我，令我觉得无人睇到我嘅努力，觉得有缺失。因此我要好好咁赞自己仔女，连一啲本来就系仔女适龄嘅责任，都会不断赞佢。

咁做嘅问题系: 呢个社会唔系咁运作。小朋友喺屋企做小小事都获得大量认同，出到来社会做好多事先可能获得小小认同，咁咪间接制造咗朵温室小花，好难适应社会要求？

讲咁耐，其实都系想大家下次赞小朋友叻之前，停一停、谂一谂：究竟呢个赞系小朋友需要嘅，定系我需要嘅？

咁Carol Dweck有咩建议呢？佢就话要称赞过程中小朋友付出嘅努力。即使结果同你预期有出入，因为Carol Dweck相信，只要肯努力，小朋友始终都会活出自己生命嘅色彩。

所以Edge心理学家觉得，Carol Dweck讲嘅，唔系单只系叫父母改口，由赞「你好叻喎」改成「好努力喎」（虽然两者都重要）。除咗咁做之外，都诚邀父母从心底里面扩阔眼界：其实人生流流长，成败不只决定于一次默书、一个考试、一次升学，而系喺长远嘅人生路上。能否顺流逆流都坚持努力不懈，收放自如，先系人生成功关键。

杨健恩

Edge临床心理学家

============================

普及心理 欢迎转载

想睇埋其他专家贴士，请提供电邮地址

本篇文章亦于作者个人专页刊登

心理学妈（https://www.facebook.com/onbecomingmama/）

============================

管教孩子，好多时都会好大压力。我哋心理学家可以提供Skype、Zoom等视像辅导服务，逐步教你有效管教，做个无忧父母！欢迎Facebook Pm我哋，或者Whatsapp 5539-6773倾倾吖。

#做个无忧父母#心理健康#精神健康#视像辅导#网上辅导#压力#管教#家长#教养