专家精选文章

以下係真人真事改編故事，以保障當時人私隱。

我本身喺公立醫院做嘢，接受過唔同科嘅轉介，而其中有段時間做過兒科。

事情係咁嘅：一對年青嘅專業人士兼雙職夫婦帶咗個五歲女嚟。佢哋喺走廊等緊見我嘅時候，我觀察發現佢哋好似無咩唔尋常，只係父母有啲緊張，個細路女就碌大隻眼周圍望。

入到房，寒喧完一陣之後就問佢哋點解嚟睇心理科，父母好似有咩難言之隱。另一方面，阿囡就好乖咁坐喺角落玩玩具，而佢揀嘅玩具都無咩唔尋常嘅地方。時間過得好快，但我連佢哋屋企有咩問題都未知，好難做得哂個評估兼俾意見。（講真佢哋排期排咗咁耐先見到，我都想佢哋有啲得著咁走嘅……）

於是我叫阿爸帶個女出返走廊玩，留返媽咪喺房，希望女人同女人講嘢可以直接啲快趣啲。阿爸同囡囡出咗去之後，佢終於講到個問題：「阿囡喺屋企磨梳化 （用私處磨擦梳化扶手以獲得性快感）。」我聽到呢句即刻緊張起嚟，因為受性侵犯嘅兒童通常會有「重演創傷」（trauma re-enactment）嘅徵狀，將被侵犯嘅情節喺日常生活做返出來。所以我即刻要喺剩返嘅時間入面評估阿囡有無被性侵犯，而放佢返屋企安唔安全。

評估嘅細節唔講喇，亦都唔講得，因為個小朋友得5歲。心理學家有特別方法喺唔引導佢嘅情況下問到想知嘅嘢（如果我講咗點評估，俾侵犯者睇到，有可能被用作犯案工具。侵犯完個小朋友之後會嚇個小朋友：「如果有人咁樣問你，你就咁樣答。」）。

故事嘅結局係：Edge心理學家OT咗少少（其實平時都OT嘎啦），搵唔到阿囡有被性侵嘅跡象，而結論係阿囡磨梳化屬於嬰幼兒自瀆行為，係正常而唔洗醫嘅！

Q：大人就話自瀆啫，嬰幼兒都自瀆？

係呀，其實道理好簡單：嬰幼兒所有感觀都未成熟、發展中，而性興奮都只係其中一種感觀刺激。因此本質上，嬰幼兒磨私處同佢玩食物、赤腳踩草地係相似嘅，都係獲得不同感觀刺激以發展感觀敏鋭度。文獻記載BB最早嘅自瀆年齡係8個月！

遇到嬰幼兒有自瀆動作，家長可以：

1. 保持冷靜，切勿反應過大

2. 了解一下嬰幼兒平時接觸嘅人，肯定佢唔會受到性侵犯

3. 排除咗性侵犯嘅可能性後，可以用分心法慢慢幫佢過度：

– 如果佢喺公眾地方做，直接stop佢話俾佢知唔可以- 如果喺私人地方做，確保佢身邊無異性大人。即係如果女BB喺床上面，而公公企得好近，就叫公公行一行開。小朋友會透過呢種教學，學識呢樣嘢係要私底下做。

– 佢只係整兩下就由得佢，但如果太耐你唔想佢繼續，就用玩具引佢，等佢玩玩具而忘記本做嘅嘢。

其實嚴格黎講，大人如果咩都唔做，小朋友做飽咗，感觀發展得到滿足，就自然會停 。不過現代家長鍾意聽方法，我先講啲無傷大雅嘅招數出來，等大家安心啲 ！

楊健恩

Edge臨床心理學家

============================

普及心理 歡迎轉載想定期收到專家貼士，請將電郵PM我們本篇文章亦於作者個人專頁刊登心理學媽（https://www.facebook.com/onbecomingmama/）

============================

管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。#做個無憂父母#心理健康#精神健康#視像輔導#網上輔導#壓力#管教#家長#教養