專家精選文章

情境題：
A. 一個帶咗玩具又睇住電話嘅小朋友，成餐飯冇望過任何人，對眼冇離開過自己嘅玩具同電話

B.一個冇帶任何玩具嘅小朋友，睇住爸爸媽媽點樣同親戚商量叫乜嘢點心，落單嘅時候交俾邊一個職員，同上菜嗰陣點清楚啲點心，同時觀察每個人傾談嘅表情內容同氣氛

你哋話邊個學到社交技巧呢？

現代家長好多時有個誤解，覺得要幫助小朋友成長就要時時刻刻安排佢哋密密麻麻嘅活動同刺激，忽略咗人有時係需要有空間去成長嘅。大人自己鍾意煲劇，煲得幾個鐘都想抖下Hea下放空下啦，個腦唔攰對眼都攰。

小朋友都要時間放空架，有個好有型嘅term, 叫做free play, 即係話喺確保佢安全嘅情況之下，由得佢玩，佢鍾意點玩、玩啲乜嘢，係小朋友自己嘅選擇。

幾十年前，個個家長為咗搵食，都冇時間理個小朋友平時做啲乜嘢，其實個個細路都係度free play緊，同時培養自主同激發創意。（不過又唔可以太多自由時間喎，太多就算唔叫疏忽照顧，小朋友都會覺得寂寞啦）

咁幾多free play先夠啊？可以參考聯合國兒童基金會建議，每日1小時。咁當然要跟返當日屋企嘅行程同每個家庭嘅情況啦，如果嗰日已經出咗街去公園玩左成日咁就唔使特別再安排一個鐘比佢自己玩喇。

咁點解唔帶玩具出街都可以當係free play呢？因為當一個人悶玩起上嚟，係可以激發創意，身邊任何一樣物件都係玩具，譬如餐紙巾可以當係新娘頭紗。

唔帶玩具出街除咗係乘機free play外，仲係好好嘅社交訓練：小朋友觀察大人點樣去商量叫邊一碟點心、張點心紙交俾邊一個職員、職員之間點樣互動（侍應同部長係有唔同嘅神態同說話方式嘅）家長就算冇時間同小朋友逐一講解，佢觀察得多自然入到腦。

仲有一個最直接嘅原因，就係帶小朋友出街已經要帶九萬樣野，仲要睇埋佢件玩具，整唔見左又多樣野黎煩，係咪唔帶出街小個壓力仲好啊？

問：佢出街係咁扭要攞玩具，已經遲到喇，點算好呀？

Edge心理學家教大家一招「假民主」﹗呢招好好用㗎，俾佢有得揀但兩個選擇都係大人想要嘅結果：「我哋唔帶玩具出街架，你想幫手攞水樽定係攞濕紙巾啊？」

頭幾次做到記得比獎勵：「你啱啱好幫得手喎，獎你食餅餅丫」（當然零食係平時少俾先夠吸引力啦）之後幾次已經養成習慣就唔使再比獎勵喇！

楊健恩
Edge臨床心理學家
============================
普及心理 歡迎轉載
想定期收到專家貼士，請將電郵PM我們

本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋Edge心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5315-9645傾傾吖。
#做個無憂父母#心理健康#精神健康#視像輔導#網上輔導#壓力#管教#家長#教養