專家精選文章

假设小朋友默书或者考试攞咗高分，你会点赞佢？有啲家长会话：「好聪明喎﹗咁高分﹗我知你系好醒格，呢啲嘢一定难唔到你嘅﹗」有啲家长又会话：「唔好咁赞佢呀，会赞坏㗎。」边样先真？

首先，要知道应唔应该咁赞小朋友，我哋要先知道赞赏系点运作，点解会有用。赞一个人唔系因为你想佢开心，唔系要佢自我感觉良好，亦唔系只系要认可佢嘅努力咁简单。赞赏系奖赏嘅一种，对影响行为好有用。当我哋因为某个人做咗某一个好嘅行为而奖赏一个人嘅时候，呢个人会将个奖赏连系咗落个行为度，喺将来做多啲呢个行为去博取更多嘅奖赏。所以，奖赏可以令一个人喺将来做更多某个行为。

正正因为咁，边个行为连系咗落个奖赏度就好重要喇。而我哋赞赏嘅内容，系可以影响到小朋友将边个行为连系落个赞赏度。如果我哋喺佢拎到高分嘅时候赞佢： 「好聪明喎﹗咁高分﹗我知你系好醒格，呢啲嘢一定难唔到你嘅﹗」 咁佢系将边个行为连系落个赞赏度？聪明？聪明唔系行为。咁卖弄小聪明系咪行为？系。而要卖弄小聪明即系要喺唔温书嘅情况下都可以考到高分。所以，你嘅赞赏变相鼓励咗佢唔温书。

从行为学嘅角度，好明显答案系我哋唔应该赞小朋友聪明。咁应该赞佢啲咩呢？既然我哋知道小朋友会将赞赏连系到佢做嘅某个行为，我哋应该把握机会赞佢一啲我哋想佢做多啲嘅行为，亦即系一啲小朋友可控制嘅因素，例如努力温书、识咗一啲上次默书唔识嘅字、犯少咗啲唔小心嘅错误等等。例如，家长可以讲： 「好叻喎你识咗上次唔识嘅嘢喎，你一定系好努力温书喇﹗」 「你今次好小心喎，无乜错到啲唔小心嘅错误，抵赞﹗」 此外， 其实呢啲「可控制因素」，大部分都同分数无关。即系话，家长唔驶等到派分先至赞小朋友，你大可以喺小朋友温书嘅时候已经赞佢勤力、赞佢专注。而就算有啲行为系派咗卷之后先知道，例如佢有冇犯唔小心嘅错误、佢有冇识返啲上次唔识嘅嘢等，家长亦可以只系同小朋友检讨呢啲行为，而只字不提个分数，等小朋友唔好咁关注个分数。点解要小朋友唔好咁关注个分数呢？因为分数控制唔到(受太多因素影响，例如份卷嘅深浅)，而且小朋友关唔关注分数对佢嘅学习表现同动机有好大影响。下回分解。

Edge教育心理学家

蔡博麒

============================

普及心理 欢迎转载

想睇埋其他专家贴士，请PM提供电邮地址

读者如有问题想问专家，欢迎电邮至[email protected]

============================

照顾孩子，好多时都会好大压力。我哋心理学家可以提供Skype、Zoom等视像辅导服务，逐步教你有效照顾，做个无忧父母！欢迎Facebook Pm我哋，或者Whatsapp 5539-6773倾倾吖。

#做个无忧父母#心理健康#精神健康#视像辅导#网上辅导#压力#管教#家长#教养