專家精選文章

提起童年陰影，大家會諗到咩？虐打定性侵犯？呢啲創傷可以影響深遠，而一世不能磨滅。不過睇得呢個page嘅家長咁有心湊小朋友，斷估都唔會咁做嘅（有嘅話唔該去警署自首兼尋求治療）！但有一種關係同樣對孩子成長做成極大傷害（sorry語氣重咗，不過真係有害）：就係將孩子當成自己嘅知己。

如果你係一個好樂天、無煩惱嘅人，問題就唔大。不過成人世界有幾複雜，作為父母嘅你喺家庭、工作同人際關係之間拉扯，有掙札同負面情緒好正常。如果你將啲錯綜複雜嘅關係同思緒毫無保留咁同你孩子傾訴，咁就大劑喇！

🧑🏼👨🏼：有幾大劑啫，我講完舒服咗，佢聽完咪又係走去玩，唔似有嘢呀！
（其實小朋友有事都未必即時俾你睇到，多數從行為表現出嚟）
咁唔該🙏🏻🙏🏻🙏🏻細心睇以下解說：

根據皮亞傑（Piaget）嘅認知發展論 （cognitive development stage），小朋友未夠11歲係未識得複雜嘅邏輯同抽象思維。（🧑🏼👨🏼：Edge心理學家我唔明！）即係話你同個小朋友講：「阿爸阿媽因為管教你而嗌交，唔係你嘅錯，只係爸媽之間有嘢未處理。」，
小朋友係無能力理解。佢哋會諗：「鬧交嘅內容有我，但唔關我事？」跟著佢哋就會得出以下結論：「都係我唔好，如果我叻啲嘅話，爸爸媽媽就唔會唔開心。」

咁如果同小朋友講心事，內容唔牽涉佢又點呢？其實咁會一樣有問題，因為佢一係就唔知你講咩，一係理解之後發現自己無能力幫到手，並會覺得好無助。（👶🏻：我知爸爸媽媽點解唔開心，但係我幫唔到佢）而一個人長期覺得自己身處喺無助嘅環境入面，輕則就會無自信、低動力，重則會感到龐大嘅習得無助感（learned helplessness） 。直接引發抑鬱，或者埋下將來抑鬱嘅種子（真人真事，真係有60幾歲嘅婆婆，自己連孫都有埋，喊住咁同我講如果細個點樣點樣，或者媽媽會開心啲）。

其實又唔需要製造個童話世界嘅，呢個世界本來就係充滿問題同煩惱。父母煩惱緊嘅事，可以點到即止咁俾小朋友知大概內容，但要傳達個信息：大人世界有大人世界要處理嘅事，⭐️而大人處理緊⭐️，你做返小朋友就得喇！

所以我幾時都鼓勵父母除咗工作同家庭之外，一定要有屬於自己嘅時間同生活，不要將孩子變成自己嘅全部。簡單啲就一個人落街跑步，多啲就約埋三五知己去個短旅行；你愈能夠快樂自在咁做人，你孩子就愈能夠放心去過個快樂童年！

楊健恩
Edge臨床心理學家
============================
普及心理 歡迎轉載
想定期收到專家貼士，請將電郵PM我們

本篇文章亦於作者個人專頁刊登
心理學媽（https://www.facebook.com/onbecomingmama/）
============================
管教孩子，好多時都會好大壓力。我哋心理學家可以提供Skype、Zoom等視像輔導服務，逐步教你有效管教，做個無憂父母！歡迎Facebook Pm我哋，或者Whatsapp 5539-6773傾傾吖。
#做個BetterMe#心理健康#精神健康#視像輔導#網上輔導#壓力#疫情 # #結婚#拍拖#關係#親子